18 ноября 2022

«Горнай улууһа» муниципальнай оройуон дьаһалтатын аатыттан 20 сыллаах үбүлүөйгүтүнэн Эһигини итиитик-истиҥник эҕэрдэлиибин! 2002 сыл сэтинньи 25 күнүгэр тэриллибит реабилитационнай киин күн бүгүн таһаарыылаахтык үлэтин ыытар. Эһиги Улууспут оҕолорун киһи быһыытынан иитэн-таһааран, сайыннаран, кыаҕын арыйан, үүнэр көлүөнэни олоххо бэлэмниир сыалы-соругу толорорго үгүс өрүттээх үлэҕит номнуо 20 сылын толору томточчу туолла. Эһиги реабилитационнай кииҥҥит олох араас уустук балаһыанньаларыгар түбэспит сокуоннай саастарын ситэ илик оҕолорго уонна кинилэр дьиэ кэргэннэригэр толору реабилитацияны ааһалларыгар биир бастакыннан буолаҕыт. Бу коллектив үлэтэ-хамнаһа үрдүк таһымҥа ыытылларын мэктиэлиир. Сылын ахсын «Надежда» программа көмөтүнэн төрөппүттэри куһаҕан дьаллык утары эмтээһин үлэтин үгүс өрүттээхтик ыытаргытын бэлиэтии көрөбүн. Кэнчээри ыччаты иитиигэ-үөрэтиигэ киин коллектива, общественность, төрөппүттэр бииргэ үлэлээһиннэрэ ситиһиилээхтик ыытыллар. Эһиги көмөҕүтүнэн олоххо көхтөөх, саҥаны айар дьоҕурдаах уонна дьулуурдаах, бэйэтин бигэтик сананар эдэр көлүөнэ үүнэр, улахан дьон олох сөптөөх суолун булар. Республикатааҕы, улуустааҕы күрэхтэһиилэргэ, конкурустарга үрдүк ситиһиилээхтик кыттаргытын үөрэ көрөбүн. Кэнчээри ыччаты иитиигэ, улахан дьону кытары үлэҕэ олохторун анаабыт дьоммутугар махтал тылларын аныыбын. Эһиги бэйэҕит, сыралаах үлэҕитинэн эдэр көлүөнэ педагогтарга үтүө холобур буолаҕыт. Эһиэхэ туох баар үчүгэйи, чэгиэн доруобуйаны, этэҥҥэ буолууну, тулууру уонна үлэҕитигэр ситиһиилэри баҕарабын! Горнай улууһун баһылыга Никита Андреев