Бүгүн, тохсунньу ый 19 күнүгэр отчуоттуур бөлөх Маҕараска үлэлээтэ. Нэһилиэнньэҕэ бастатан туран «Прием граждан» тэрилиннэ. Дьон улуус баһылыгар Никита Андреевка бэйэлэрин кыһалҕаларынан киирэ сырыттылар. Түөрт олохтоох түөлбэҕэ баар нэһилиэк уонна улуус өттүттэн көмө туһунан чопчуластылар, тулаайахтарга дьиэннэн хааччыйыы хайдах барыахтааҕын туоһуластылар, балыыһа тымныытын этиннилэр, стационарнай койка баар буоларыгар туруорустулар, кырдьаҕаска интернатка миэстэ уочаратын ыйыттылар.

Киин балыыһа сүрүн бырааһын солбуйааччы Татьяна Юмшановаҕа балыыһаҕа кардиолог быраас хаһан баар буоларын уонна круглосуточнай куойкалаах стационар үлэлиирэ буоллар диэн санааларын эттилэр.

Прием түмүктэммитин кэннэ отчуотка киирдилэр. Бу күн 47 олохтоох саалга мустан ааспыт сылга улууска ыытыллыбыт үлэни кытары билистэ.

Улуус баһылыга Никита Андреев дакылаатын кэннэ, тутатына олохтоохтор ыйытыктарын тула аһаҕас кэпсэтиигэ киирдилэр.

Көрсүһүүнү баһылык нэһилиэнньэ биир туруорсубут боппуруоһа — музей үлэһитэ улуус бюджетыттан көрүллүбүтүн туһунан биллэрэн саҕалаата. Улууска туризмы сайыннарар сыалтан Маҕараска хайыһар киинэ оҥоһуллар кыахтааҕын дьон сэҥээрэ, астына иһиттэ. Балыыһа котельнайын саҥардыыга, спорт саалатын тутууга быһаарыныы быйыл үлэтэ барыа, ититии ситимигэр ханнык ыал холбоноро инникитин өссө мунньахтар нөҥүө быһаарыллан иһиэхтэрэ диэн иһитиннэрдэ.

Олохтоохтор дьиэлэригэр кииннэммит ититии ситимигэр холбоноллоро саамай уустуктук турар боппуруостара буоларын өссө төгүл биллэрдилэр. Сжижженнай гааһы холбонорго субсидия көрүллэригэр Никита Викторович үлэ министиэристибэтигэр бу боппуруоһу туруорса сылдьабыт диэн хоруйдаата.

Нэһилиэккэ онкологияннан ыалдьыы 44% үрдээбитин дьон соһуйа, «Дальневосточнай гектар», медицинскай кылаас туһунан интэриэһиргии иһиттилэр.

Оҕо уһуйааныгар ууну ыытыы дьыалата ханна тиийбитин туоһуластылар. Бу ыйытыкка улууска быйыл биллэриллибит «Благоустройство» сылын чэрчитинэн бу үлэлэр былааҥҥа киирэн сылдьалларын, үлэтэ салгыы чуолкайданыа диэн эппиэттээтилэр. Дьиэ иһэ тымныы, кырачааннар доруобуйаларыгар охсор кутталааҕынан үлэ ыытылларын көрдөстүлэр.

Улуус олохтоохторун «Горнай түмсүү» нөҥүө патриотизмы сөргүтэргэ ыҥырдылар. Үүнэр көлүөнэҕэ саха ынаҕын  кытары билиһиннэрэргэ Бэрдьигэстээххэ мини зоопаркаҕа сайыҥҥы бириэмэҕэ көрдөрүөххэ сөбүн, таксистар докумуоннаах буолуохтаахтарын уонна стационарнай койка баар буоларыгар этиилэрин киллэрдилэр.

Дьокуускай — Маҕарас — Бэрдьигэстээх хайысханнан сылдьар автобуска Маҕарастартан олорсооччуларга сороҕор миэстэ тиксибэтинэн хайдах эмит биир, икки миэстэни уурдарыахха сөп дуо диэҥҥэ билигин электроннай билет оҥоһуута быһаарылла сылдьарын туһунан иһитиннэрдилэр.

Түмүккэ мустубут дьон нэһилиэк, улуус бэккэ диэн кэнники сылларга тупсубутун бэлиэтээтилэр, көрсүһүү туһалаахтык ааспытыттан дуоһуйа тарҕастылар.