Норуот сомоҕолоһуутун күнүнэн эҕэрдэ!

3 ноября 2022

Убаастабыллаах Горнай улууһун дьоно-сэргэтэ!

Эһигини Норуот Cомоҕолоһуутун күнүнэн итиитик-истиҥник «Горнай улууһа» МТ дьаһалтатын аатыттан эҕэрдэлиибит!

Бу бырааһынньык биһиги судаарыстыбабыт, Өрөспүүбүлүкэбит, улууспут историятыгар дойду туһугар сомоҕолоһуу, патриотизм, гражданскай эппиэтинэс холобурунан буолар. Быйыл Саха АССР төрүттэммитэ 100 сылыгар, норуодунай суруйааччыларбыт Семен Данилов 105, Софрон Данилов 100 саастарын бэлиэтиир үбүлүөйдээх сылбытыгар уонна дойдуга ыытылла турар специальнай байыаннай эпирээссийэ бу күнү ураты суолталыыр.

Сомоҕолоһуу күнэ — Ийэ сирбит инники кэскилин туһугар үрдүк эппиэтинэс уонна эр санаа холобурунан буолар. Арассыыйа араас муннуктарыгар олорор бары омуктар бэрэстэбиитэллэрэ – биһиги эһээлэрбит, аҕаларбыт – биир киһи курдук адьырҕа фашиһы утары Ийэ дойдуну көмүскүүр кырыктаах кыргыһыыга туруммуттара. Норуот улуу сомоҕолоһуутун түмүгэр аҕа көлүөнэ сэрии кэнниттэн урусхалламмыт дойдуну чөлүгэр түһэрбитэ, сүдү промышленностаах индустриальнай дойдуну айан-тутан таһаарбыта.

Билигин дойдубутугар буола турар уустук кэмҥэ Арассыыйаҕа олорор бары омуктар санаа күүһүн холбоон, биир сомоҕо буолан алдьархайы туоруур кэммит кэллэ. Төрөөбүт сирбитин, республикабытын, судаарыстыбабытын, норуоппутун  көмүскүүр ытык суолталаах күн. Биһиги, саха омук дьоно, билиилээх, олоххо бэлэмнээх, айылҕаҕа харыстабыллаах, аҕам саастаах дьоммутугар ытыктабыллаах сыһыаннаах, төрөөбүт дойдуга бэриниилээх, араас норуоту кытта биир тылы булан кэпсэтэр, доҕордоһор буолуохтаахпыт. Бу буолар — сомоҕолоһуу.

Барыгытын Норуот сомоҕолоһуутун күнүнэн эҕэрдэлиибит! Ситиһиилэри уонна дьиэ кэргэҥҥит, төрөөбүт дойдугут уонна модун Арассыыйа туһугар айа-тута тураргытыгар баҕарабыт!

Горнай улууһун  баһылыга                                                           Никита Андреев

Улуус депутаттарын Субэтин бэрэссэдээтэлэ                           Алквиад Тарасов