23 февраля 2023

Олунньу 21 күнүгэр Мытаах нэһилиэгэр, Аҕа баһылык Иван Егорович дьаһалынан 2023 сыл Аҕа сылынан биллэрэн, сыл арыллыыта ыытылынна.

Бочуоттаах ыалдьытынан Саха сирин Аҕаларын лигатын бэрэсэдээтэлэ Айхал Иванович Габышев ыалдьыттаан, эҕэрдэ тылын этэн туран, нэһилиэктэргэ, улуустарга аҕа сылын биллэрэн элбэх үлэлэр ыытыллаларын иһитиннэрдэ уонна дьаһалтаҕа олохтоохторго бу сыл үтүө түмүктэрдээх буоллун диэн баҕа санаатын эттэ.   

«За вклад в повышение статуса отца и укрепление института семьи» знактарын Артур Егоровка уонна Егоров Владимирга туттартаата.

Бу дьоро киэһэҕэ Саха сирин Аҕаларын лигалара, Горнай улууһун Аҕаларын сүбэтэ, Мытаах нэһилиэгин Аҕаларын сүбэтэ инникитин бииргэ үлэлэһэргэ сөбүлэҥ түһэристилэр.

Нэһилиэк Аҕа баһылыга Иван Егорович үүммүт сылга былааннаммыт  соруктары үлэ хайысхалары билиһиннэрдэ, мустубут дьон сэргии иһиттилэр, түмүккэ олохтоох нэһилиэк кыаҕынан эҕэрдэ кэнсиэринэн үөрүүлээх чааһынан түмүктэннэ.

Горнай улууһун Аҕаларын сүбэтэ.