7 февраля 2023

Бүгүн республикатааҕы отчуоттуур бөлөх Ким Борисов салайыытынан Одунуга үлэлээтэ. Нэһилиэк баһылыга Владимир Текеянов правительство салайааччыларыгар амбулатория, котельнай, музей дьиэлэрин көрдөрдө.

Бастаан амбулаторияны көрдүлэр. Манна биэс палата, терапевт, фельдшер, икки медсестра, акушерка үлэлииллэр. Киин балыыһаҕа кардиолог быраас 0,5 ставкаҕа үлэлиир буолан дьон күһэллэн куоракка харчы төлөөн көрдөрөллөр диэн кыһалҕаларын үллэстэллэр.

Бөһүөлэк федеральнай трасса таһыгар сытарынан массыына саахала тахсар түгэнигэр Бэрдьигэстээххэ дылы айаннаан тиийэ охсубаттарынан, реанимация суоҕунан олохтоохтор эбии киэһээҥҥи койка миэстэлэрин, саҥа скорай массыынатын, гарааһы туруорсаллар.

Котельнай боппуруоһа. Маҕарас олохтоохторо 35 дьиэни, үс социальнай эбийиэги ( АТС, ветеринария, амбулатория) хааччыйан олорор котельнай аварийнай туруктааҕынан сибээстээн саҥаны туруорсаллар.

1996 сылга тутуллубут эбийиэк котеллара эргэрбит, потолога сууллубут, уопсай туруга мөлтөх. Манна түөрт кочегар үлэлиир. Эбийиэк туругун СӨ ОДьКХ уонна энергетика министиэристибэтин департаменын салайааччы Гурианна Арсеньева сыаналаата.

Салгыы нэһилиэк дьаһалтата музей дьиэтин көрдөрдүлэр. 1984 сыллаахха тутуллубут оҕо уһуйаана билигин иһэ тымныы, капитальнай өрөмүөҥҥэ наадыйар диэн бэрэстэбиитэллэргэ иһитиннэрдилэр. Манна — почта, библиотека уонна музей үлэлиир. Музей көрөөччүлэрэ ыалдьыттарга экспонаттары кытары билиһиннэрдилэр.