6 февраля 2023

Бүгүн өрөспүүбүлүкэтээҕи отчуоттуур бөлөх Кэптиҥҥэ, Маҥаныга кэлэ сылдьан СӨ Уһук Илиҥҥи федеральнай уокуруг бэрэстэбиитэлин, СӨ бэрэссэдээтэлин бырабыыталыстыбатын солбуйааччы Ким Борисов, улуус баһылыга Никита Андреев буолан анал эпирээссийэҕэ кытта сылдьар уолаттар төрөппүттэрин кытары көрүстүлэр.

Тыа хаһаайыстыбатынан дьарыктанар Маалтааны олохтоохторо Егоровтар дьиэ кэргэн төрдүс оҕолоро ааспыт сыл балаҕан ыйыгар анал байыаннай эпирээссийэҕэ кытта барбыта. Ийэтэ, аҕата иһитиннэрбиттэринэн, уоллара сибээскэ тахсар, төлөбүрү барытын ылбыт. Нэһилиэк дьаһалтата муус, мас киллэрэн абыраата диэн астына бэлиэтээтилэр. Төрөппүттэр уоллара сотору кэминэн уоппуска ылан дойдутугар кэлэрин күүтэллэр.

Орто-Сурт олохтоохторо Васильевтар дьиэ кэргэҥҥэ уоллара байыаннай эпирээссийэҕэ барбыта сыл аҥара буолбут. Сибээскэ тахсар, чааһыгар соҕотох саха буолан республикаттан көмө тиийбэт эбит диэн төрөппүттэрэ эттилэр. Боппуруоһу Ким Борисов көрүөх буолла.

Дьиэ кэргэн аҕата быстах хомуурга барбыт уолаттар болдьохтоох сылдьаллара уонна ол болдьохторо туоллаҕына төннөн кэлэллэрэ буоллар диэн санаатын үллэһиннэ.