Күндү Горнай улууһун олохтоохторо, дьоно-сэргэтэ!

Эһигини үүнэр 2023 сылынан итиитик-истиҥник эҕэрдэлиибит! 🎄🎄🎄🎄🎄

Улуус депутаттарын Сэбиэтэ, Горнай улууһун дьаһалтата, олохтоох бэйэни салайыныы уорганнара, улуус тэрилтэлэрин, нэһилиэнньэни кытта хардарыта бииргэ үлэлэһэн, Арассыыйаҕа норуот искусствотын уонна норуоттар материальнай култуурунай нэһилиэстибэлэрин, Саха АССР төрүттэммитэ 100, Саха сиригэр Ийэ, улууска Экология, Софрон Петрович Данилов төрөөбүтэ 100, Семен Петрович Данилов төрөөбүтэ 105 сылларын бэлиэтииргэ үгүс үлэни-хамнаһы ыытан кэллибит.

Улууска быыбар ыытыллан норуот бэйэ кандидаттарын талбыта, экология чэрчитинэн араас тэрээһин, ыраастаныы үлэтэ барбыта. Тутууга Универсальнай стрелковай комплекс уонна 50 миэстэлээх интернат арылынна. Мытаахха 12 квартиралаах, Күөрэлээххэ 18 квартиралаах таас дьиэ, Бэс-Күөлгэ В.Д. Лонгинов аатынан 150 миэстэлээх орто оскуола тутуутун үлэлэрэ саҕаланна. Билиҥҥи кэмҥэ Бэрдьигэстээххэ С.П. Данилов аатынан 550 миэстэлээх орто оскуола, 7 таас дьиэ киирээри турар. Улуус араас эбийиэктэрин өрөмүөннэригэр үп-харчы көрүллэн ис-тас көрүҥү тупсарыы, өрөмүөн үлэлэрэ ыытылыннылар.

Ааһан иһэр сыл элбэх уларыйыылары, уустук быһыыны-майгыны аҕалла. Дойдуга биллэриллибит анал байыаннай операцияҕа Горнай улууһуттан Ийэ дойду чиэһин көмүскүү биһиги уолаттарбыт кытта сылдьаллар. Кинилэр дьиэ кэргэннэригэр, дьонноругар этэҥҥэ төннөн кэлэллэригэр гуманитарнай, психологическай уонна да атын өйөбүл миэрэлэрэ оҥоһулла тураллар.

Күндү улуус олохтоохторо, 2022 сылга бары ситиһиибит инники олоххо уонна бэйэ күүһүгэр эрэли, түмсүүлээх буоллахпытына, барыны бары кыайар кыахтаахпытын түстээтэ. Улууска 2023 сыл «Тупсарыы» сыла биллэриллибитинэн биһиги инникибитигэр элбэх саҥа соруктар турдулар. Дойдубут өссө күүскэ үүнэ-чэчирии, сайда турарыгар туох баар күүспүтүн ууран туран үлэлиэхпит диэн эрэнэбит.

Үүнэр сылга Эһиэхэ барыгытыгар дьолу-соргуну, этэҥҥэ буолууну, ил-эйэни, ыраас халлааны баҕарабыт. Төрөөбүт үөскээбит ытык Горнайбыт үүнэ чэлгийэ туруохтун, дьоммут-сэргэбит чөл-доруобай олохтоох, уһун үйэлээх буоллуннар.

Саҥа кэлэн иһэр 2023 сылынан, күндү улууспут дьоно!

Улуус баһылыга Никита Андреев, депутаттар сэбиэттэрин бэрэссэдээтэлэ Алквиад Тарасов