Бүгүн улуус баһылыга Никита Андреев салайыылаах бөлөх ааспыт сыллааҕы үлэтин отчуота Октябрьскай нэһилиэгиттэн саҕаланна.

Бастакыннан улуус баһылыга нэһилиэнньэни кытары көрүстэ. Никита Андреевка — икки киһи, улуустааҕы социальнай управление начальнигын эбээһинэһин толорооччу Сардаана Гуляеваҕа эмиэ икки киһи «Обращение граждан» нөҥүө боппуруостарын кэлэн ыйыттылар.

Кэлбит дьон үксүн дьиэ уочаратын туһунан, сир боппуруоһун, миллеарация үлэтин, техника, гаас котелын ылыытын туһунан ыйыталлар эбит.

Салҕыы отчуот чааһа саҕаланна. Уопсайа 35 киһи кэлэн иһиттэ.

Нэһилиэнньэ ыйытыыта үгүс. Саа докуменнарын оҥотторорго ыйытыкка билигин киин балыыһаҕа нарколог быраас суоҕунан медсправка оҥотторуута тохтоон турарын туһунан эппиэт биэрэн иһитиннэрдилэр.

Биир олохтоох оттуур сирэ ууга баран от тастарбытын, от таһыытыгар харчы көрүллүө дуо? диэн ыйыппытын баһылык инники бэриллибит докуменнары ситэ тиксэрбэтэхтэрин, бэрилиннэҕинэ ТХМ өттүттэн үбүлээһин көрүлүннэҕинэ комиссия быһаарарын туһунан хоруйдаата.

Мустубут дьон фельдшер үлэһитэ көрүллэрин, нэһилиэктэринэн сылдьар быраастары ыҥырарга, нэһилиэги эминэн хааччыйарга, социальнай хайысха сайдарыгар, интернат арылларыгар, водоскважина үлэҕэ киирэригэр уонна маслоцех тутуутун туһунан этиилэрин киллэрдилэр.

Отчуот түмүгэр киирбит боппуруостар протоколга киирэн салгыы үлэҕэ барыахтара, туруорсаргыт оруннаах диэн Никита Андреев көрсүһүүнү түмүктээтэ.