23 февраля 2023

Убаастабыллаах Горнай улууһун олохтоохторо!

Эһигини Аҕа дойдуну көмүскээччилэр күннэринэн — эр санааланыы, төрөөбүт дойдуга бэриниилээх буолууну өрө тутар бырааһынньыгынан эҕэрдэлиибит!

Быйыл ыытыллар бырааһынньык ураты суолталаах. Бүгүҥҥү күн Аҕа дойдубутугар куттал суоһаабытыгар биһиги  уолаттарбыт төрөөбүт дойдуларын чиэстээхтик анал байыаннай операцияҕа көмүскүү сылдьаллар. Кинилэр хорсун быһыылара — история улахан уонна улуу кырдьыга, хас биирдии чиэһинэй киһиэхэ уонна гражданиҥҥа Аҕа дойдуну таптааһын дьайыылаах бастыҥ холобура. 1941-1945с. дойдубут бөҕө тирэхтээх буоларын туһугар аҕа көлүөнэ дьоммут хорсун быһыылара төһүү күүс буолбутун биһиги умнубаппыт, кинилэр Албан ааттарын кэриэстиибит, чиэстээхтик тутабыт. Билигин байыастарбыт кыайыы көтөллөөх дойдуларыгар эргиллэн кэлэллэригэр эрэнэ күүтэбит.

Олохтоммут үтүө үгэс быһыытынан олунньу 23 күнүгэр биһиги Аҕа дойду бары көмүскээччилэрин, улууспутугар олорор эр хоһууннарын, Улуу сэрии ветераннарын, бойобуой киирсиилэр кыттыылаахтарын, Сэбилэниилээх күүстэр кэккэлэригэр сулууспалаабыттары уонна сулууспалыы сылдьааччылары, убайдарбытын, аҕаларбытын, эһээлэрбитин, дьиэ аҕа баһылыктарын эҕэрдэлиибит. Бу бырааһынньык сир үрдүгэр эйэ, сиэрдээх быһыы уонна төрөөбүт дойдуга таптал кэрэһитэ буоллун! Барыгытыгар кытаанах доруобуйаны, эр санааны!