17 апреля 2024

Бүгүн А.А.Агеев аатынан оҕо спорт оскуолатыгар Саха АССР хас да төгүллээх чемпиона, бокс бэтэрээнэ, тренер, спорду өрө тутааччы Афанасий Ильич Парфенов төрөөбүтэ 80 сылыгар аналлаах, сырдык аатын үйэтитэр оскуола саастаах уолаттарга боксаҕа өрөспүүбүлүкэтээҕи аһаҕас турнир үөрүүлээх арыллыыта буолла.
Үөрүүлээх быһыыга-майгыга улуус баһылыга Н.В.Андреев, Бэрдьигэстээх нэһилиэгин баһылыга А.Г.Аргунов эдэр спортсменнарга, кэлбит ыалдьыттарга, тэрийээччилэргэ баҕа санааларын эттилэр уонна Афанасий Ильич кэргэнигэр Зоя Саввичнаҕа сибэкки дьөрбөтүн, махтал суругу туттардылар.
Өрөспүүбүлүкэ курдук таһымнаах спорт биһиги улууспутугар ыытыллара олус эппиэтинэстээҕинэн сыаналыыбыт. Араас улуустартан мустубут эдэркээн боксердар турнир кэннэ өссө да ситиһиилэрэ үксүү, үрдүү туруоҕа.