23 февраля 2023

Бүгүн Аҕа дойду көмүскээччилэрин күнүн көрсө улуус дьаһалтатыгар Афганистан уонна Чечня бойобуой дьайыы бэтэрээннэрин, СВОҕа кытта сылдьар биир дойдулаахтарбытын кытары көрсүһүү буолла.

Актовай саалаҕа улуус баһылыгын бастакы солбуйааччы Алгыс Стручков, улуус баһылыгын солбуйааччы Павел Петров, Бэрдьигэстээх нэһилиэгин баһылыга Алексей Аргунов, улуус бэтэрээннэрин сэбиэтин бэрэссэдээтэлэ Любовь Пахомова, байыаннай комиссар Алексей Бадлуев уолаттары кытары көрсөн санаа атастастылар.

Төгүрүк остуолга олорон билиҥҥи ситуацияны, инникигэ эрэллээх буоларга баҕа санааларын, сүбэлэрин эттилэр, улуус, республика өттүттэн оҥоһуллар көмө туһунан кэпсээтилэр. Украинаҕа сылдьан сырдык тыына быстыбыт Егор Татариновы, Афганистаҥҥа уонна Чечняҕа охтубут байыастары чуумпурааһын мүнүүтэтинэн ахтан-санаан ыллылар.

Улуустааҕы бойобуой дьайыы бэтэрээннэрин бэрэссэдээтэлэ Афанасий Ефремов госпитальга эмтэнэ сылдьар уолаттар туруктарын туһунан билиһиннэрдэ. Кэлбит буойуттарбытын үөрэн-көтөн көрсөргө нэһилиэк дьаһалтатын үлэтин күүһүрдэргэ көрдөстө. Бойобуой дьайыыга кыттыбыт бэтэрээннэри, билигин кытта сылдьааччылары дьиэннэн, эбитэр учаастагынан хааччыйарга этии киллэрдэ.

Байыаннай комиссар Алексей Бадлуев үөскүүр уустуктары кэпсээтэ. Биир сүрүн уустук — госпитальтан чааска барбакка тутатына дьиэлэригэр бараллара. Онтон сылтаан кинилэр докумуоннарынан дезертир курдук көстүөхтэрин сөп. Баҕа санааларынан барбыт дьон статустарын туһунан кэпсээтэ.