24 января 2023

Бүгүн, тохсунньу ый 24 күнүгэр отчуоттуур бөлөх иккис нэдиэлэтээҥҥи былаанынан мунньаҕы Дьиикимдэ нэһилиэгиттэн саҕалаата. Культура дьиэтигэр 37 олохтоох мустан ааспыт сылга улууска ыытыллыбыт үлэни кытары билистилэр.

Бэрэстэбиитэллэр 2022 сыл түмүгүнэн буолбут тэрээһиннэри, былаан толоруутун, хайысхаларынан статистиканы, араас субсидиялар, оҥоһуллубут көмө туһунан иһитиннэрдилэр. Баһылык улууска туризмы сайыннарар сыалтан Дьиикимдэҕэ музейы көрө Дьокуускайтан нэдиэлэ аайы оскуола оҕолоро кэлэллэрин ситиһиэххэ диэн этииттэн саҕалаата. Отчуот кэннэ ыйытыыларга киирдилэр.

Киин балыыһа бырааһын солбуйааччытыттан Татьяна Юмшановаттан онкологияннан ыарыы тоҕо элбээбитин, статистиканы, төһө киһи бу ыарыыттан олохтон туораабытын, киһи өлүүтэ быраһыанын, ковид балаһыанньатын, кардиолог, психиатр-нарколог кэлэрин ыйыттылар. Татьяна Гаврильевна кардиолог быраас билигин үөрэҕи бара сылдьар, сотору кэминэн кэлиэ, онтон нарколог вакансията аһаҕас турарын, саа уонна массыына быраабыгар медосмотрга билигин балыыһаҕа допуск эрэ турар кыахтааҕын иһитиннэрдэ. Диспансеризацияны кэмигэр ааһарга ыҥырда.

Гаас нэһилиэккэ киирэр кыахтаагын, «Хаарбах дьиэлэртэн көһөрүү»бырагыраамматынан көһөр дьиэ үлэтэ салгыы ыытылларын тутуу салайааччытыттан Николай Дьяконовтан туоһуластылар. Олохтоохтор Улуу үрэх күргэтэ оҥоһулларын истэн үөрбүттэрин биллэрдилэр.

Үөрэх хаачыстыбата үрдүүрүгэр туох үлэ-хамнас, тайахха лицензия нэһилиэктэринэн тыырыллар кыахтааҕын, Горнайга нефть — газ, сиртэн хостонор баайы үөрэтиигэ үлэни ыйыттылар. Сир баайдарын өттүгэр Улуус дьаһалтатыгар «Якутнедра» тэрилтэ сотору буола — буола бу сирдэр хаһаайыннаах дуо, ураты харыстанар сирдээх дуо диэн запростары ирдиир диэн үллэстилэр. Онон баһылык төрүт сирдэргитин билигин бэйэҕитигэр сыһыарарга дьулуһун диэн ыҥырда.

Эдэр ыалларга бэриллибит «Кэскил» түөлбэҕэ киинтэн ититии хаһан киирэрин, ПЧСка көмө көрүллэрэ буоллар диэн көрдөстүлэр. Итиэннэ быйылгы ПЧС былааныгар түөрт ыал баарын, сыаната ааҕылла сылдьарын Николай Дьяконов иһитиннэрдэ.

Хондураайы үрэҕэр, оттуур сирдэргэ барар суоллар алдьаммыттарын, колеяларын көннөрөн муоста тутарга этиилэрин киллэрдилэр. Сиинэ суола муниципальнай суолларга киирбитинэн «Якутлесресурс» кытары бу үлэ былааннанарын, сүбэ-мунньах тэрийиллэригэр протоколга киллэриэххэ диэн сүбэлэһии буолла.

«Горнай Ас» быйыл Дьиикимдэ бөһүөлэгэр маслоцех туталларын былааныылларын директор Ефремов Николай билиһиннэрдэ.

Уу боппуруоһа быһаарыллара охсорун, асфальт оҥоһулларын, спортзал ремоннанарын, саҥа оскуола, оҕо уһуйаана бөһүөлэккэ тутуллалларын олохтоохтор туруорустулар. ГУП ЖКХ нөҥүө субсидия көрүллэрин, Эбэлиир суолга турба угулларын, үлэһит киһини кэмигэр сыаналыырга, сөптөөх награда туттарарга этиилэрин киллэрдилэр.

Түмүккэ Никита Андреев нэһилиэк дьоно олус актыыбынайдык кэпсэтиигэ кыттыбытын астына бэлиэтээтэ.