Күн иккис аҥаарыгар улуус баһылыгын 2022 сылын түмүгүнэн отчуот Аһымаҕа буолла. Олохтоохтор «Прием граждан» кэлэн актыыбынайдык кытыннылар.

5 киһи тыа хаһаайыстыбатын сирдэрин докумуонугар уонна бөһүөлэк иһигэр сир боппуруоһун ылыы туһунан сир сыһыаннаһыыларын начальнигыттан Маргарита Чемезовоттан билистилэр. Этиилэр салгыы үлэҕэ бардылар.

Бэрдьигэстээххэ Заречнайга Кеши Иннокентьева уулуссаҕа элбэх оҕолоох квартал уота, суола хаһан оҥоһулларый, гаас стояга хайдах тардылларый диэн тутуу уонна архитектура начальнигар Николай Дьяконовтан ыйыттылар.

«Просекатын солонуута уонна уот ситимин тардыыта быйыл оҥоһуллуохтаах. Элбэх оҕолоохторго бэриллибит уһаайбаларга, саҥа кыбаарталларга суолун оҥоруу уонна гаас ситимин тардыыта салгыы былааннаахтык барыа» диэн эттэ. Маны тэҥэ Бэрдьигэстээххэ хаарбах дьиэттэн көһөрүү туһунан дьон интэриэһиргиирэ билиннэ.

Улуус баһылыгар Никита Андреевка биир киһи эдэр ыалларга дьиэннэн хааччыйыы боппуруоһун туһунан кэлэн ыйытта.

Үс киһи санаторнай — курортнай эмтэниигэ путевка хайдах ылыахха сөбүн социальнай управление начальнигын эбээһинэһин толорооччу Сардаана Гуляеваттан биллилэр. Ол дьонтон биир киһи миэстэтигэр заявление суруйда, онтон биир киһиэхэ инбэлииккэ таҕыстаҕына хайдах путевкага тиксэрин туһунан быһаардылар.

Отчуокка кулууп дьиэтигэр 41 олохтоох кэлэн кытынна. Кэпсэтии ааспыт сылга ыытыллыбыт үлэни сырдатыыттан саҕаланна. Салгыы нэһилиэнньэттэн боппуруостарга киирдилэр.

Элбэх оҕолоохторго бэриллэр учаастак оннугар харчыннан ылыы механизмын ыйыттылар, пенсионнай фондага уларыйыылары, доруобуйаларынан хааччахтаах дьоҥҥо путевка биэриитин, эдэр исписэлиистэргэ дьиэ тутуллуон сөбүн кыаҕын туһунан боппуруостар киирдилэр.

Балыыһа, доруобуйа харыстабылын өттүгэр нэһилиэккэ кэккэ ыарахаттар баалларын биллэрдилэр. Дьон сырыы аайы киин балыыһага барбакка миэстэтигэр ыйга биирдэ анал быраас кэлэн көрөрүн туруорсаллар. Бааннар банкоматтарын аҕалан почта дьиэтигэр туруоруохха сөп этэ диэн этии киллэрдилэр. Быстах хомуур быһыытынан барбыт уолаттар ийэлэригэр көмө туһунан билистилэр.