Улууска быйыл «Благоустройство» сылын чэрчитинэн хаарбах дьиэттэн көһөрүү бырагыраамматынан үлэ салгыы барар. Туох тутуу ыытылларын, ыытылла турарын туһунан Улуус дьаһалтатын архитектура уонна тутуу салаатын начальнига Николай Дьяконов иһитиннэрдэ:

«Былырыын 2022 сылга үс дьиэ тутуутун саҕалаабыппыт. Ол курдук Бэрдьигэстээххэ Софрона Данилова уулуссаҕа 42 квартиралаах, Күөрэлээххэ 18 квартиралаах, Дьиикимдэҕэ 12 квартиралаах таас дьиэ. Быйыл бу үс эбийиэк тутуллан киириэхтээх. Маны тэҥэ, билэргитин курдук, Бэрдьигэстээххэ МСО түөлбэҕэ 176 квартиралаах дьиэ былырыын бүтүөхтээҕин бэдэрээччик үлэтин хойутатан дьиэ киириитэ бу сылга көспүтэ. Онон кулун тутарга, муус устарга киириэхтээх диэн сыал-сорук турар.

Тутуу министиэристибэтигэр улууска тутуу өттүгэр ыытыллар үлэ быйылгы былаанын көмүскээбиппит. Ол чэрчитинэн улууспутугар 51 квартираны, эбии 2431 кв.м. хаарбах дьиэни өссө көһөрөргө диэн ирдэспиппит. Онон алта нэһилиэккэ үлэ саҕаланыахтаах. Бэрдьигэстээххэ биир дьиэ, Кировскайга 6, Маалтааныга 4, Одунуга  9, Маҥаныга 4 уонна Солоҕоҥҥо 10 квартиралаах дьиэлэри тутууларын үлэлэрэ саҕаланыахтаахтар. Бу үлэлэр быйылгыттан ыытыллан эһиил 2024 сылга үлэҕэ киириэхтээхтэр. Маны тэҥэ Атамайга биир уопсай 12 квартиралаах дьиэ тутуллара хаалар. Билигин докумуоннарын сааһылааһын үлэтин ыытабыт».