Бу күннэргэ Саха АССР төрүттэммитэ 100 сылынан республикабыт күннэрэ Москва куоракка ыытылла тураллар.

Ол чэрчитинэн ахсынньы 7 күнүгэр биир дойдулаахпыт, Саха омук киэн туттуута, тумус киһитэ, норуот суруйааччыта Софрон Петрович Данилов төрөөбүтэ 100 сааһыгар аналлаах литературнай биэчэр Россия суруйааччыларын сойууһун дьиэлэригэр Москва куоракка буолан ааста.

Тэрээһиҥҥэ улуу убайбытын, Софрон Даниловы ахта-саныы СӨ бырабыыталыстыбатын бэрэссэдээтэлин солбуйааччы Сергей Местников, СӨ культураҕа уонна духуобунуй сайдыыга миниистир Юрий Куприянов, Саха суруйааччыларын союһун бэрэссэдээтэлэ, Саха народнай поэта Наталья Харлампьева, саха народнай суруйааччыта Николай Лугинов, Россия суруйааччыларын союһун бастакы сэкиритээрэ Геннадий Иванов, улуус баһылыга Никита Андреев, Мытаах баһылыга Иван Петров, Софрон Данилов кыргыттара, Вера, Любовь Даниловалар уонна Саха Сирин, Горнай улууһун бэрэстэбиитэллэрэ кытыннылар.

Ыалдьыттар Софрон Данилов туһунан ахтыы оҥордулар, бэрт элбэҕи олоҕун туһунан кэпсээтилэр. Киэһээҥҥи тэрээһини көрөөччүүлэри сэргэхситэ таарыйа суруйааччы суруйбут хоһооннорун ырыа-тойук оҥорон Саха Сирин биллиилээх артыыстара толордулар.