21 октября 2022

Бүгүн иккис сырыытын бэйэтин сатабыллаах салайааччы быһыытынан көрдөрбүт, нэһилиэгин дьонун-сэргэтин итэҕэлин ылбыт, быыбарга инники күөҥҥэ тахсан эрэллээхтик кыайбыт «Маҥаны нэһилиэгэ» муниципальнай тэриллии баһылыгынан талыллыбыт Михаил Николаевич Текеяновы үрдүк дуоһунаһыгар киирэр үөрүүлээх сиэрэ-туома ыытылынна. Маҥанытааҕы быыбардыыр учаастак хамыыһыйатын бэрэссэдээтэлэ Пелагея Баишева балаҕан ыйын 11 күнүгэр ыытыллыбыт быыбар түмүктэрин нэһилиэнньэ иннигэр билиһиннэрдэ. Үөрүүлээх тэрээһиҥҥэ кыттыыны ыллылар: Горнай улууһун баһылыгын бастакы солбуйааччы Алгыс Стручков, Бэрдьигэстээх уонна Мытаах нэһилиэктэрин баһылыктара Алексей Аргунов, Иван Петров, Маҥаны нэһилиэгин депутаттара уонна тэрилтэлэрин салайааччылара, ыҥырыылаах ыалдьыттар. Маны таһынан нэһилиэк 11 уокуругар саҥа талылыллыбыт нэһилиэк сэбиэтин депутаттара дуоһунастарыгар киирдилэр.