Алтынньы 15 күнүгэр «Солоҕон нэһилиэгэ» тыа сирин түөлбэтин баһылыга Александра Павловна Александрова үрдүк солотугар/дуоһунаһыгар/ киирэр үөрүүлээх сиэрэ-туома буолан ааста. Үөрүүлээх тэрээһиҥҥэ кыттыыны ыллылар: Горнай улууһун баһылыга Андреев Никита Викторович, Бэрдьигэстээх уонна ыаллыы сытар Мытаах нэһилиэктэрин баһылыктара Аргунов А.Г., Петров И.Е. ,улуус тыатын хаһаайыстыбатын управлениятын начальнига Дьяконов В.Н., Солоҕон нэһилиэгин депутаттара уонна тэрилтэлэрин салайааччылара, ыҥырыылаах ыалдьыттар. Балаҕан ыйын 11 күнүгэр Солоҕон нэһилиэгин Муниципальнай тэриллии аҕа баһылыгын уонна депутаттарын быыбара буолан ааста. Быыбар түмүгүн билиһиннэрэргэ уонна удостоверениялары Солоҕон нэһилиэгин учаастактааҕы быыбарнай хамыһыйа бэрэсэдээтэлэ Тарасова Тамара Рафаэлловна быыбар хаамыытын этэн туран саҥа баһылыкка уонна нэһилиэк 11 уокуругун депутаттарыгар удостверениялары туттартаата. Ол кэннэ Александра Павловна нэһилиэгин дьонун иннигэр Солоҕон нэһилиэгин баһылыгын солотугар киирии андаҕарын эттэ. Түөскэ кэтиллэр үрүҥ көмүс бэлиэни Солоҕон нэһилиэгин депутаттарын сэбиэтин бэрэссэдээтэлэ Захаров Николай Николаевич кэтэртэ. Сайдыы суолун тутуһа, сарсыҥҥы күнүн түстэһэ , олохпут оҥкулун оҥорсо, сүбэни –соргуну түмэ бүгүҥҥү үөрүүлээх күҥҥэ элбэх алгыс тыл этилиннилэр. Үтүө мааны Солоҕон нэһилиэгин дьоно-сэргэтэ, дьоһуннаах олох тускулун туһаайан, кэлэр кэм кэтит кэскилин түстээн, биир санаанан салайтаран баһылык Александра Павловна тула биир сомоҕо буола түмүстүбүт. Солоҕон нэһилиэгин аҕа баһылыгын дуоһунаһын сүгэн кэлбит, Солоҕон нэһилиэгин Бочуоттаах олохтооҕор Захаров Алексей Николаевичка нэһилиэгин социальнай-экономическай сайдыытыгар киллэрбит кылаатын иһин знак туттарылынна. Төрүт сирбит Солоҕоммут сайдарын туһугар туруулаһан үлэлииргэ саҥа баhылыкка Александра Павловнаҕа саҥа талыллыбыт нэһилиэк депутаттарыгар ситиһиилээх үлэни баҕарабыт. Солоҕон нэһилиэгин үтүө аата өрүү үүрдүү турдун, нэһилиэкпит үлэһит, түмсүүлээх дьоно алгыһынан арыалланан үрдүктэн үрдүккэ тахсан иһиэхпит.

Анна Дормидонтова. Виктор Семенов хаартыскаҕа түһэриитэ.