22 сентября 2022

Балаҕан ыйын 20 күнүгэр олохтоох муниципальнай инициативалары өйүүр (ППМИ) бырагыраамма чэрчитинэн Степан Ковров аатынан Күөрэлээх орто оскуолатыгар саҥа анал тиэхиникэни, идэни баһылыырга уонна массыына быраабыгар үөрэнэргэ саҥа трактородром арылынна. Күн бүгүн тыа хаһаайыстыбатын күннээҕи үлэтигэр-хамнаһыгар, бородууксуйаны оҥорон таһаарыыга тракторы бас билэр исписэлиис, киэн билиилээх киһи тахсарыгар бу үөрэх олуһун диэн наадалаах буолар. Бу эбийиэк улууска эрэ буолбакка, өрөспүүбүлүкэҕэ тиийэ тарбахха баттанар. Инники кэскиллээх кэлэр ыччаты үөрэтэргэ, нэһилиэк, оскуола сайдарыгар төһүү күүс.